ناغیل2
ههدی، هودو، من!
ههدی ایدی، هودو ایدی، من ایدیم!
گئتدیک شیکارا. گؤردوک بیر اووو.
دئدیم: ههدی توفنگین وار؟
دئدی: یوخ!
دئدیم: هودو توفنگین وار؟
دئدی: یوخ!
دئدیم: منده ده بیری وار لولهسی یوخ!
دئدیم: ههدی فشنگین وار؟
دئدی: یوخ!
دئدیم: هودو فشنگین وار؟
دئدی: یوخ!
دئدیم: منده ده بیری وار باریتی یوخ!
بو باریتسیز فشنگی لولهسیز توفنگه قویوب نشانه گئدیب، اووون لاپ آلنینین اورتاسیندان ووردوم.
دئدیم: ههدی پیچاغین وار؟
دئدی: یوخ!
دئدیم: هودو پیچاغین وار؟
دئدی: یوخ!
دئدیم: منده ده بیری وار تییهسی یوخ!
بو تییهسیز پیچاق ایله اوون باشینی کسیب دهریسین سویدوم!
دئدیم: ههدی قازانین وار؟
دئدی: یوخ!
دئدیم: هودو قازانین وار؟
دئدی: یوخ!
دئدیم: منده ده بیری وار دیبی یوخ!
گتیریب بو دیبی یوخ قازانی گووهان ایله دلیب سیریم ایله سیریدیم.
اهت لری تؤکوب ایچینه اوجاق اوسته قویدوم پیشمهگه.
اهتلری تؤکولوب سویو قالدی.
اوتوردوق یئمهگه.
آما چوخ یاغلی ایدی.
منیم ساغ الیم یاغلی اولدو چکدیم سول باشماغیمین اوزونه.
ساغ باشماغیم آجیق ائلهییب گئتدی.
داغا چیخدیم گؤرمهدیم.
داشا چیخدیم گؤرمهدیم.
گئدیب دوزده ایگنه ایله بیر قویو قازدیم.
ایگنهنی سانجدیم قویونون دیبینه چیخدیم ایگنهنین اوستونه.
گؤردوم اودو ها باشماق تاییم موغاندا چلتیک اهکیر.
گئتدیم موغانا.
دئدی: صبر ائله چلتیک یئتیشسین بیچیب، دؤیوب، گؤتوروب، گئدک.
بیر گون گئتدیک بیچمهگه.
گؤردوک قابانلار دوشوب چلتیگی یئییرلر.
حیرسلهنیب اوراغی آتدیم قابانا.
اوراخ گئتدی قابانین قویروغونون آلتینا.
قابان قاچدی، اوراق بیچدی!
قابان قاچدی، اوراق بیچدی!
چلتیکلر هاممیسی بیچیلدی.
ییغیب تایایا ووردوق.
بیر گون گئتدیک دؤیمهگه.
گؤردوم بیر دسته آت دوشوب تایایا چلتیکلری یئییرلر.
بیر داش گؤتوروب آتدیم، دهگدی آتین نالینا.
نالدان بیر اود آتیلیب دوشدو تایایا.
چلتیکلری سؤکوب قیراغا آتدیم.
بیردن گؤردوم چلتیگین ایچیندن بیر پالان چیخدی.
پالانی سؤکدوم گؤردوم ایچیندن بیر قولان چیخدی.
قولانی آچیب اوخودوم، گؤردوم منیم بو دئدیکلریمین هاممیسی یالان چیخدی.
خئیره سؤیلهمز
(بعضی آداملار هر نه سوروشسان انسانا پیس خبرلر وئرهرلر. خئیر سؤز آغیزلاریندان چیخماز. بونلارا «خئیره سؤیلهمز» آدام دئیهرلر.)
بیر گون بیری «مشهد»دن قاییتمیشدی کند اهلی پئشوازا گلمیشدیلر. هامی خوش گلدین دئییر و زیارت قبول دئیه الینی سیخیردیلار. بیر زامان گؤردو بیر مشهور خئیره سؤیلمز شخصلردن بیری قاباغا گلیر اهل وئریب اؤپوشندن سونرا مشهددن گلهن آدام اؤز یانیندا دئدی: "من بوندان هر کیمی سوروشسام دئیهجککی اولوبدور. یاخشیسی بودور بیر قره ایتیمیز وار، اونو سوروشوم. دئسه ده اولوبدور جهنمهجن، اهمیتی یوخدور".
بو منظور ایله دئدی: فلانکس بیزیم بیر قره ایتیمیز وار ایدی او نه حالدادیر؟
خئیره سؤیلهمز غمگین قیافه توتاراق جواب وئردی کی: اؤلدو دا…
مشهدی کیشی اورهگینده گولومسنهرک، گئنه سوروشدو: ائـ…. نه جور اولدو اؤلدو؟
خئیره سؤیلهمز دئدی: واللاه او ساری اینهگیز موندار اولاندان سونرا اونون اهتیندن یئمیشدی اودورکو اؤلدو.
مشهدینی بیر آز نیگرانلیق باسدی. دوباره سوروشدو: اینهک نییه اؤلدو بس…؟
خئیره سؤیلهمز بیر آه چکیب دئدی: ائح… صاحابسیز مال اوجور اولاردا… رحمتلیک آنان مرحوم اولاندان سونرا داها اینهگه باخان اولمادی اؤلدودا. مشهدینین بدنی سیلکهلندی. "ای وای!" دئدی… "آنام اؤلوبدور؟ اونون کی بیر زادی دگیلدی".
خئیره سؤیلهمز کدرلی حالدا دئدی: واللاه نه دئییم… اوغلانلاریزین قویویا دوشوب اؤلمهگینی ائشیدنده بیر دن ائله یازیغین باغری چاتدادی… بئچارا…
مشهدی کیشی ایکی اهللی باشینا ووراراق دئدی: اوغلانلار قویویا دوشدولر؟!... اونلار قویو باشیندا نه قاییریردیلار؟
خئیره سؤیلهمز بیر آز دوروقسوناراق: اح بابا… نه قدهرکی رحمتلیک آنالاری ساغایدی اوشاقلاری قویمازدی ائودن ائشیگه چیخسینلار. آما...
مشهدی کیشی باشینی، ساققالینی یولوب آغلایاراق سوروشدو کی: توفاقین داغیلسین بو خبرلرین ایله… دئ گؤروم بیزیم ائوده ساغ قالان وار یا یوخ؟
خئیره سؤیلهمز دئدی: واللاه من بوندان آرتیق بیر زاد بیلمیرم. آنجاق ایندی گلهنده گؤردوم کی سیزین کوچه قاپیزی پالچیقلاییبلار ایکی نفر حهیهتیزه سامان بوشالدیرلار.
اوخوماق ایله یاشامین موناسیبتی
آدام ائولنمهمیشدن قاباق اوخویاندا دئیهر: ائی داد… ائی داد… ائی داد…
ائولنهندن سورا دئیهر: ائی یار… ائی یار… ائی یار…
ائلهکی اوشاغی اولدو دئئهر: آی بالام ائی… آی بالام ائی…
ائلهکی قوجالدی دئیهر: یازیق اولان جانیم ائی وای…
اوزوم آغ اولدو
بیر گون بیر مالدار آدام سفره گئتدیکده یوز دهنه قویونونو باجیسی اوغلونا تاپیشیریب گئدهر. باجیسی اوغلودا قویونلارین هاممیسینی ساتیب خرجلهر. بیر مددتدن سونرا دایی گلهر باجیسی اوغلونون یانینا، دئیهر: دئ گؤروم قویونلار نه حالدادی، هاردادیلار؟ باج اوغلو دئیهر: دایی اوتور حئساب ائلییهکدا..! سورا بئله دئییهر:
دولاییدان دویداق اوشدو… قیرخ بئشی داشدان دوشدو.
ییرمیسین دئردیم قصصابا… ییرمیسین گتیرمه حئسابا.
بو الدو سکسان بئش قالدی اون بئش.
اون دؤردونو ده قورت یئدی. قالدی بیریسی.
بو زامان یانینداکی دهرینی داییسینین قاباغینا قویاراق دئدی: بودا او بیریسینین دهریسی.
بو زامان دایی حیرصلهنیب اویان بویانا ال اوزالدیب الینه با کاسا دولو قاتیق گئچدی، گؤتوروب باج اوغلوسونون باشینا چالدی.
باج اوغلو الی ایله قاتیغی اوزوندن سیلهرک باشینی گؤیه توتاراق دئدی: شوکر اولسون آللاها، داییمین یانیندا اوزوم آغ اولدو.
بیری بیر آیری کنددن اؤز کندلرینه قاییدارکن یاخشی قووونلار گؤردوکده بیر دهنه یاخشیسینی سئچیب آلیر. یول اوسته بیر آغاج کؤلگهسینده اوتوروب دینجهلهرک قووونو کسمک خییالینا دوشور.
پیچاغی چیخاردیب کسمگه باشلاییر. آما قابیقلاری چوخ اهتلی کسیر. اؤز یانیندا دئییرکی: "بوردان گلیب گئدنلر بو قابیقلاری بو جود اهتلی گؤرسهلر یقین دئیهرلر کی بو قووونو یئیهن «آغا»دان «خان»دان ایمیش".
آما، قووون چوخ شیرین ایدی و قابیقلاری اهتلی کسدیگینه گؤره دویمادی. هی قابیقلارا باخدی. دئدی: "یاخشیسی بودور کی قابیقلاری گهمیرم. گلیب، گئدن دئسینلر کی بو آغانین نؤکریده وار ایمیش. اهتینی اؤزو یئییب قابیقلارینی دا نؤکری گهمیریبدیر".
بیر یاندان قووون شیرین، بیر طرفدن ده کیشی بیر آزجانا ائله بیل کی قارینقولو ایدی. گؤزو قابیقلاردا قالیر. آخیردا بو قراره گلیب دئییرکی: "قووونلارین قابیقلارینی دا یئییم. قوی گلیب، گئدنلر دئسینلر کی: بو آغانین قویونودا وار ایمیش."
قابیقلاری دا بوجورلوق ایله یئییر. آما گؤزو هله دویمور. بیر ایکی دهنه توخومو تیلیفی ایله آغزینا آتیب گؤرور کی، یوخ… یوموشاق تزه توخوم تیلیف ایله نئجه یئمهلیدیر. دئییر: "هان… ایندی ائله بو توخوملاری دا تیلیفلی زادلی یئیهرم. گلیب، گئدنلر دئیهرلر کی: بو آغانین تویوغو دا وار ایمیش."
سیز سایین یولداشلار بوردا تورک فلکلوریک آثاری اینترنتده اولانلاری اوخویا بیلرسیز